近年有幾次親身經歷令我有這個感覺。
Online 服務並非 Online 辦妥
話說有次想為環保出點綿力，打算把實體月結單改為用電子形式收取。在 ebanking 搞了一場大龍鳳，最後竟然話我個電郵無登記，在 ebanking 搞唔到，我打電話又搞唔到，最後要落分行，果次排隊半粒鐘，去到櫃位又搞三四個字，排我後面果個肯定咒罵我。我都唔想，鬼叫恆生咁老土。原來 online 係搞唔到 online service的！
無反應的 chatbot
之前恆生出個 chatbot 叫 Dori，安裝後會有些優惠提供。我裝完後無反應！好多朋友都用到。我懷疑我係異類，引起佢個 bugs。因為佢個 chatbot 要用 facebook messenger，我無 facebook，但我有 IG，可以用 IG Acc 來到 facebook messenger。我認識的人中，都無人好似我咁唔用 facebook 但又用 facebook messenger，可能係呢個原因 Dori 就唔受我玩啦。
手機 app 自 Lock Acc
早排佢話要裝個手機 app，用某些服務要用 mobile 認證。安裝期間，有個位要入自己身份證號碼的其中幾個字。我竟然入錯！入錯一次後仔細睇清楚規則，再入，又錯！再三睇清楚，都係入錯！點會咁架！入錯三次比佢 lock 住左。要打電話去解，仲要在辦公時間！
算，我當自己白痴仔入錯。但好似又唔係，點會咁多人一齊做白痴？
我老婆申請，又係咁樣被 lock。又打電話去搞。
後來我老婆轉電話，再申請，又被 lock。
聽同事講，佢都被 lock！
咁多人都遇上同樣問題，大家都係咁白痴？
無能的生物認證
又係個恆生 app，某些功能要入密碼，可以用指紋。我部 sony 電話有指紋，但係恆生 app 用唔到！LG 機又用唔到。有人用華為都用唔到。Android 機入面只係聽過 Samsung 用到此功能。
但話分兩頭，我用 Google Pay 上網比錢，一樣係用指紋。點解係個恆生 app 唔得！？除左個 app 寫得爛，都應該無第二個解釋。
忠實客戶的剖白
枉我用了恆生咁多年，記得當年係大學，個個大學生都會申請信用卡，但我校園內無恆生，我都特登去幫襯恆生申請信用卡，真係忠實 Fans 啦！
但今時今日，講服務，去櫃位就排餐死，用電子服務又諸多問題。多年來真係痴心枉種！
FXXK
