一些小事

與同事到了一間在葵芳新開業的酒樓午膳。
食物，不夠暖，甚至是凍的。
還對著客人呼喝。
不會有下次。

**************************************************************
某天接到一個電話，聽了兩句，原來是某銀行的借貸優惠。於是我說：「唔駛啦，唔……」
我想說唔駛啦，唔該。個該字還未說出口，已傳來電話的斷線聲音。這類電話，大家 cut 人線就 cut 得多，試過比人 cut 線嗎？
基本上，這類電話，我例牌都只說：「唔駛啦，唔該。」最多說三次，三次後仍在煩著我，我就 cut 線。估唔到這次佢如此「爽快」cut 我線。這家銀行，哈哈哈，抵我早前 cut 了張信用卡，不再做佢客仔。

**************************************************************
到奧海城 food court 食個飯，在等待期間見隔離台個男仔打機打得很投入咁。突然，有個漂亮的女士捧著一盤食物走來那張台，我心想，咁多位都要搭台。原來那個女仔是那打機男的女朋友……男的依然繼續打機，女的在放好食物等待男友一齊吃。
真係掂，要個女朋友去買，自己一路打機一路等吃，真係好服侍。我都想有個咁 gei 女朋友，哇哈哈哈哈)))))))))))))

**************************************************************
乘地鐵，我一手扶著鐵柱在看書。突然，竟然有個麻甩佬無視我隻手捱落條柱。頂佢個肺，在人多的車廂內，我見到d柱男柱女便覺討厭。你成個人捱落條柱到，其他人唔駛扶架啦？如果車廂無乜人，你捱邊條柱我又真係唔 mind，唔好阻到其他人便可。通常d柱男柱女，都係捱去一條空柱，只不過後來車廂越漸多人時，又不會讓開身子讓其他人去扶手。但這次這個真係極品啦，無視他人照捱可也，我也忍不住出聲：「有無搞錯呀」然後去抓緊附近的「吊環」。那麻甩佬有乜反應？佢無打我，扮聽唔到當無事。

**************************************************************
**************************************************************
經常都說社會怎讓發達，教育水平越來越高。又如何？
我的道德價值觀，其實不高。我自己不是甚麼正人君子，也不苛求人人也是這樣。很多時無論人家做乜都好，只要唔妨礙到別人，我都不太care。
人越大，我覺得這個社會很多人很多時都連這點也做唔到。是缺少了兩分尊重？