暈暈噩噩，又過完一個周末。
除夕晚，與一大班朋友打邊爐。實在抵食，不是任食，八個人，這次每人 $86，任食都無咁便宜，材料也不錯，店員粗粗地，不過好 Nice，service 幾好，好過不少大集團。那就是葵芳千式火鍋，新張期間，免收加一。短短兩星期內大家幫襯了兩次，上次去可能剛開業未有口碑，好多位，這次去，坐無虛席，好在有訂位！
我覺得無論食物和店員都好過稻香。之前同朋友去過荃灣稻香，發覺食物差了不少，都好過任食果D，但同以前比實在差得遠。那些餃細粒了很多！那次去稻香叫醉雞鍋，上次去千式也叫醉雞鍋，但千式足料得多！哈哈哈，一碟醉雞有四粒雞子？那隻是甚麼雞？？今次叫豬骨鍋也很正很多料。
打邊爐期間，飲了兩罐啤酒。之後大家上 Wesley 家中玩耍，我又飲了三杯紅酒。不知是飲酒太多還是太夜(近來我都很早睡，很早起)，未夠十二點已覺眼睏，倒數完吹下水，趁我還有精神，趕快離開，沒有車，我要行返屋企。
吹水期間爆左很多野，哈哈哈，原來我走左之後爆得還多，錯過了~~~
差唔多三點先訓，十點幾起身，好耐都未試過咁遲起床。不過醒了仍像魂不附體，好似通完頂咁。因為太夜訓？因為飲酒太多？或者是雙管齊下的作用啦。
咁多年來，我都未試過飲醉酒。或者可能係我醉酒的反應與別人不同。我未試過飲到胡言亂語，也未試過飲到四圍嘔，也不會面紅。不過係飲得太多，第二朝會唔願起身。而昨日我成日都魂不附體，下次還是飲少D啦，人年紀漸大，應要更注重健康。
到了星期日，恢復正常。一早起身，睇左兩份報紙，睇左一陣電視，根住睇書睇 document，睇呀睇，越睇越覺陰陰寒寒。天色很差，厚厚的雲，實在比昨天凍了不少。很想去訓，好啦，上床午睡一會。睡了一個多小時，其實不能完全入睡，因為真係覺得好凍，點解咁凍，仲凍過昨晚。一路睡，雙腳都是冰冷的，處於半睡半醒的狀態。聽到電視在播電影胭脂扣。上一次看，都不知是多少年前，內容真係唔記得，但有個很深刻的印象，就是覺得那是一部很好睇，但不合理的電影。不是指當中的鬼魂，而係對如花的處理，太過偏幫如花了，把她講成一個弱者般？真的嗎？某程度上，十二少其實是比如花「帶壞」，她應該是個頗厲害的女人！梅艷芳演得好，係個角色的設定我覺得不合理。少有電影我覺得好睇，但又咁多野想插佢。這種互相矛盾的感覺，實在奇妙。
離開家中，到了葵芳，和我家相比簡直是兩個世界，好熱呀……出到銅鑼灣更加熱。
晚上約了朋友在 Outback 食飯。看看餐牌，價錢和幾年前相比好們人差不多。食材加價，各食肆都加價，這實在難得。
不過都很得出他在其他地方縮皮。例如我們訂了枱，都只可用餐90分鐘……我地未夠鐘但食完野，都趕快要我地埋單。90分鐘好似短左D，其他地方就算限時都有兩小時吧。還有，朋友說餐湯好細碗。無限 refill 的可樂、ice tea 也細杯了。雖然可 refill，但細杯一些，都應該可以慳一點。扒，好在餐牌標明重量，不能像大家樂等把塊扒縮水。點員我都覺得少了，以前店員會自報名字，有事叫佢，每位店員只服務數枱，現在店員四圍走，很忙碌(同是一腳踢，但都仍比那間不知所謂的青衣城扒王之王好得多了)！還有，我覺得少了外藉店員，或許因為近年自由行的入侵吧？上一次去Outback，都好多年前了，可能有三年以上？
席間大家討論了一會飲食文化。我想大家也認同中國的飲食文化，以及烹調方法變化萬千。但究竟點解會咁呢？教授果然係教授，這些見解聽罷後深表贊同！一，有極盡奢華的皇帝，所以有各式各樣的名貴菜式。二，要捱餓。鬼佬唔食內臟，可能因為簡單的烹調法不能煮出美味的內臟。中國人要捱餓，乜野擺得落口都唔好浪費，於是創出多種方法來好好處理。
新一年的第一個週末就此度過。
你地有乜大計？
我的大計？係秘密，哈哈哈哈哈哈))))))))))
No comments:
Post a Comment