新相機

早幾日，我買了一台小型數碼相機，Fujifilm F100FD。
官方介紹

我本身有一台數碼單鏡相機，以及一台小型的數碼相機。那數碼相機是我大三畢業前購買的，原來已經五年了。那相機近一年來我甚少使用，主要是我媽媽去玩時帶去拍拍照。以現今的覺得，那相機真的很老爺，四百萬像素 (當年可是最高級的！)，對焦超大聲，也很慢，室內、陰暗的地方，基乎對不到焦，我索性 set 去無限遠對焦算數，反正咁細台相機的景深也很長……雖然有著很多缺點，但其實優點也有不少，很內在的，不是單單兩三個字可以講出來，我也用來拍過很多很多照片。

其實我一直都有想過買多一台小型的，說實話，大機有大機的好處，細機也有細機的好處。不過不太想洗這些錢。

(很多人覺得數碼單反好專業，拍出來的照片較挸。但我老實同你講，兩者真係各有各好，單以畫面質素，大機一定係較好，但張相影得靚唔靚，係睇拿著相機果個人，唔係部相機。大機，物理結構上可以做到淺景深，即是大家見到相片中主體清楚，但背景化開的效果，很多人為之著迷，花成副薪水去買鏡皇都係為左這種效果。細機就算在同等光圈下，這效果都會弱得多，這是光學上的局限。不過我話你知，有時我都鍾意細機的「長景深」，即前後也清楚的相片。係大機，你要把光圈收細，但這樣快門就會很慢，手震就會很明顯。係細機，大光圈拍出來的景深也很長，大光圈下快門也較快，無咁易手震。所以真係各有好處的。講輕便，大機就望塵莫及啦。)

早前媽媽和親友去迪士尼 (我成家人都去過，係我未去過……)，出發前一天把相機拿出來，發覺壞了。太老吧？？媽媽又不想拿我那部大大台的相機去，於是我借了他一台菲林傻瓜機，相信拍出來的照片也不錯。但結果……

我媽媽拿去家附近的沖印店到沖曬，沖出來一 pat 屎咁，那老闆還說我的菲林有問題。我頂！還有成年先過期呀，就算過期菲林的效果也不會如此，真係當我唔識野。更可惡，就係佢把菲來剪爛了。我媽媽話個老闆話那幾格沖唔到所以剪了。有無搞錯，我沖過咁多次相都未試過咁，沖唔到都會有條屍比番人嘛！

據我估計，是屋村少人幫襯沖菲林，機內的藥水過期沖死段片！

平時我沖菲林的話都會走出九龍沖，因為轉做 CD 較平，而且貪佢客多藥水都新鮮D。今次真係……

反覆思量，還是把心一橫買一台數碼的吧，拍左堆相出來變左一 pat 屎實在難受。

五年後的技術，果然進步不少。操控很方便，真係傻瓜機。小小的機身也有 2.7 寸瑩幕，當年我那部只有 1.5，現在手電都大過佢。對焦也很快，比我那台單反更快 ( Pentax 出名慢，我那台還是幾代前的產物，購入時其實都已 fade out，不過用開龜速 dc，一買番來我都覺得對焦超快，哈哈哈哈)，出街影相對唔到焦真係令人幾泄氣，所以這台不錯。富士，顏色表現同佢出品的菲林也幾相像，我覺得藍綠很出色！不過黃紅就差D…影人有點青，不過我還未試真，可能人像 mode 會好D。Face detection 好得意，那個對焦方框會跟著人面移動，除了人面對焦，還可對人面測光，咁樣就唔會影成黑面神吧。實在方便得很……

試玩了兩日，就比阿妹借左去，一借無回頭…… -___-~~