越南大作戰 Final Mission

不經不覺，已經來到旅程的最後一日。這天很忙碌，要一早起來乘早機回胡志明市。
酒店的自助早餐由六時開始，但六時我們要走了。前一晚問過酒店職員，如果我們五點半、五點四十分左右去到會唔會有野食，職員話無。佢比左個建議我地，一個很熱心的建議，就係幫我地打包D早餐拿走……但係六個人連行李，仲要拿多六份早餐上的士，酒店打包唔嫌煩，我地上落都嫌麻煩，還是算吧。
酒店職員幫我們叫了架的士。來了越南多日，終於坐一次「快車」。無論在胡志明市、芽莊、大叻，的士在市內的車速都不快，一來道路躋塞（胡志明市尤其嚴重），二來可能以防練了無視神功的路人甲乙丙突然由路邊走出來吧，走算路面暢通，車子依然不快，40km/h 已是走得很快了。還有，多日來未見過任何高速公路。這天去大叻機場，才知道原來越南也有高速公路，時速上到去 100km/h！20分鐘左右便到達機場。如果係胡志明市，這個距離不知兩小時能否到達……
落車時的士佬同我地咬數。佢話要跟咪標計，37X,000越南幣！但酒店職員同我地講話係 180,XXX！唔知佢地溝通有乜問題啦，比左 200,xxx 的士佬，我地入去辦手續先，佢話要再電聯酒店……結果佢幾分鐘之後走了，無找番 20,xxxx 比我地。
其實我有個懷疑。之前一晚同酒店職員講，佢話會幫我地叫定的士。到這朝早係酒店 check out，是另一個職員，佢又話幫我地叫的士，車費180,xxx，仲話機場的士所以較便宜，正常要 250,XXX 左右。我懷疑我地這架所謂跟咪標收錢的的士，係晚上那位職員幫我地叫的，而不是早上那位，因而有價錢的誤會。但價錢相差一倍，就算同 250,xxx 相比也是貴了一大截，是晚上那酒店職員夾埋的士佬當我地水魚？
很肚餓呀，大叻機場有乜食呢？不像香港國際機場有各式各樣的食肆，只有小賣部，我們食了腸仔即食麵，店員說只有即食麵……但後來我見到其他顧客食米線，還有肉的，或者是店員的英文只懂sausage, instant noodle……
覺得在這機場工作真係十分得閒，每天得幾班飛機，無乜生意都很正常，壓力很低吧。我地坐低等佢送過來，還未付款的，送晒過來都無問我地收錢，老實講，可能我擔心忘記付款多過佢擔心忘記收錢。
來到之前我心想這機場會否很簡陋，原來都是很現代化的設計，也比想像中大。
內陸機，安檢都無咁嚴。行李要過X光機，但我的背包內有半瓶水未飲都無叫停我，鬈毛枝水插係背包側邊但保安見唔到也沒有事，不過JOYCE的給保安見到就截停了。
還以為有機會乘坐螺旋槳飛機，哈哈哈，大家有些失望呢，都是雙引擎噴射客機。大家有機會踏上停機坪，近距離和飛機接觸。
上機、起飛、空姐派水，咁又話落機了，大約半小時機程，很快。如果坐巴士，要十小時呀。
終於抵達胡志明市機場。與剛到越南那次不同，這次是內陸機那邊，沒有國際機場果邊咁靚，洗手間連梘液也沒有（國際機場果邊有，不過其實越南很多洗手間也沒有梘液。）當時是上午九點幾，我們要坐下午六點幾機返香港，尚有數小時可以活動。嘗試去國際機場果邊櫃枱 check in、寄行李，結果失敗。把行李寄存（要收錢呢，我覺得幾貴，好似每件 6USD)，便出市內行一行。
唉……又要面對這個仆街冚家鏟的胡志明市機場的士站。一如上次，自己截的士截唔到，找那些的士公司職員又愛理不理。找 Mailinh、Vinasun 的職員，竟然叫我地去截其他公司的的士 （Mission 1 都提過，其他公司的的士可能會有問題的。）
決定走出機場截。走出了機場，但未過那道閘，我們截獲一架的士。但過閘前比人叫停，都不知那是警察還是機場保安員，的士士機同佢交涉了一會，結果都要我們下車。行到出外面，截車簡直無難度。
真是搞不清那機場的士站是怎樣運作，是太hea？腐敗？黑暗？貪污？大家都勁火滾。有些朋友因工事私事好都去過好多地方的機場，他們也認為胡志明市的機場的士站是最仆街的一個。但我回港後在網絡上search過一下，發現都有人在的士站找 Vinasun、Mailinh 的職員，輕鬆上到車。是我地幾個太黑仔？還是現今的運作模式改變了？有興趣去胡志明市的朋友，試試如何吧。如果像我地咁黑仔，我建議走出機場外啦，由的士站行出機場，約五分鐘。唔介意比多D錢，都可以試下其他公司的的士……（網絡傳聞是正常價的兩倍或以上，所以我地都懷疑係咪機場內 vinasun、mailinh 的職員收左果D公司回拥，在機場以外很容易截到 vinasun或mailinh的的士，係機場咁仆街。）
我們去了一個叫安東市場的地方。這是一個很大的街市，位於唐人區，很多店員都懂得廣東話。來到這兒，大家主要是買些木製品作為手信。之前不少地方都見過這些木製品，想不到這兒最便宜，而且較新淨！除了木製品，還有一些刺繡品呢。另外有一層係賣衫褲，有一層賣食品。
早餐咁早只食了一個即食麵，很肚餓呀。趕快去食個午餐。離開安東市場，到了一間很大的越式餐館，每人叫了一碗越式河粉和一些小食。哈哈，河粉來到時我們搞不清哪一碗是哪一款。懂英文的店員不懂分辨各河粉，懂分辨的店員又不懂英文。結果，還是拿餐牌逐一指出來。很熱很口暍，大家也叫了兩杯飲料。
跟住去超級市場看看有沒有一些特別的零食作為手信。其實之前係芽莊見到一些，但這間超市則沒有。
然後再去多一次中原咖啡，買了一些咖啡粉作手信。
之後去了 Fanny Icecream 食雪糕。類似香港去 hagen daz。入到去發現大部分顧客都是香港人，因為香港人怕熱吧？亦可能香港食雪糕太貴，這兒的價錢是 hagen daz 的一半。至於鬼佬，或者外國食雪糕仲平過越南，曾聽朋友講過係外國成 litre 捧著來食，為到港幣都係十幾蚊，因此這店內無乜鬼佬吧？本來我們打算在星期五晚去的，據那日日間同團的香港團友說，那晚還有雪糕 buffet 呢。不過因為買唔到火車票，改乘巴士，所以唔 arm 時間。
大熱天時食個雪糕嘆下冷氣，真係爽。
最後一站去買札肉。係香港，覺得札肉係越南的招牌食品，但來到越南，又唔多見越南餐廳有得食札肉。只見過酒店自助早餐，以及一些街邊檔有札肉食品。一般去食越南菜、越南河粉的食店都唔見有札肉的。不過係街市、凍肉舖、超市，都會買到札肉。
天氣咁熱，都唔想行了，打的回機場。
時間尚早，係禁區內鋤2都鋤了個多小時。禁區前清晒D水，入到禁區勁口渴，又沒有飲水機，焗住買貴水。一瓶500 ml的水，竟要40000越南幣，係機場外的十幾倍！簡直係搶錢。
回程也是坐國泰，不過這架飛機沒有來越南果架咁新。新機，果然係定D舒服D！
在機上看胡志明市夜景都幾靚。路上一點點燈火是甚麼？那應該是電單車車頭燈吧……
就如一個導遊所說，真是 The Kingdom of Motorbike。
回到香港，飛機航線沒有經過市區，未能一覽香港夜景呢。
八日七夜越南之旅就此完結，令人依依不捨，又要繼續上班下班的生活。
Missions All Completed